Un proxecto ecosocial
desde o rural

Cultivamos biodiversidade e conciencia

Que é

Vidacircular?

Escollemos este nome porque o noso proxecto nace do respecto polos ciclos naturais da vida… e tamén polos ciclos da nosa propia historia. Os nosos avós e os nosos pais cultivaban as súas propias hortalizas; as nosas profesións alonxáronnos da terra, mais agora pechamos ese círculo volvendo a ela.

Os nosos animais producen abono que nutre o solo, que á súa vez dá alimento ás plantas coas que nos alimentamos para poder seguir coidándoas e remataremos os nosos días na terra, pechando un ciclo harmónico como a auga, que recollida da chuvia ou devolta ao chan grazas ás nosas técnicas sostibles, circula e sostén este equilibrio vivo.

Que facemos?

En Vidacircular traballamos pola rexeneración ecosocial no rural a través dun espazo que promove prácticas rexenerativas na agricultura, a educación e a vida diaria. Apostamos por un rural vivo, con solo fértil, alimentos sans e persoas conectadas coa súa contorna.

Agricultura rexenerativa

A agricultura rexenerativa busca restaurar a saúde do solo, mellorar a resiliencia dos ecosistemas, aumentar a biodiversidade e capturar carbono da atmosfera, contribuíndo así a frear o cambio climático. Partimos da idea de que o solo é un ser vivo, e que traballar con el, en lugar de explotalo, permite sistemas agrícolas máis sostibles, resilientes e produtivos a longo prazo.

Permacultura

Baséase nos ecosistemas naturais para crear sistemas autosuficientes, resilientes e respectuosos. Na nosa granxa aplicámola aproveitando a auga da chuvia e a enerxía solar, organizando o espazo de forma eficiente e fomentando a cooperación local. Máis que producir alimentos, buscamos coidar a natureza e as persoas, facendo da granxa tamén un modelo educativo e de vida sostible.

O noso bosque comestible

Un bosque cheo de vida

Deseñado en liña clave para recoller auga e rexenerar o solo, o noso bosque comestible é moito máis ca un espazo de cultivo. É un ecosistema vivo en constante evolución, onde combinamos froiteiras tradicionais galegas con especies exóticas que, debido ao cambio climático, xa poden medrar na nosa comarca.

Ademais, incluímos plantas medicinais, aromáticas, fungos e especies silvestres que atraen fauna útil e enriquecen a biodiversidade funcional. Todo forma parte dun sistema deseñado para crear solo fértil, reter auga, capturar CO₂ e alimentar a vida.

Explora o bosque

A nosa horta

Cultivo con sentido

Na horta de Vidacircular traballamos con técnicas rexenerativas que poñen no centro a saúde do solo e o equilibrio do ecosistema. Non empregamos químicos nin labramos, senón que favorecemos os ciclos naturais, o acolchado, os abonos verdes e a rotación de cultivos para alimentar o solo e, a través del, ás persoas.

Cada temporada escollemos cultivos adaptados ao clima e ao momento, combinando hortalizas de sempre con variedades esquecidas e resistentes. A nosa produción é pequena, diversa e pensada para alimentar con sentido: alimentos cheos de sabor, historia e vida.

Visita a nosa horta

Colabora con Vidacircular

Apoia o proxecto, visita a finca, participa nas nosas actividades ou ven de voluntario/a

Como?

Falemos!

Se che resoa o que facemos, queres visitar o espazo, colaborar ou simplemente saber máis, estaremos encantados de escoitarte.

CONTACTA CON VIDACIRCULAR

Escríbenos

vidacircular@vidacircular.es